Friday, August 17, 2007

الشخليلة و لا اليويو؟؟؟؟


الصورة اللى فوق دى شفتها فى المدونة دى

و بصفتى محترفة إعلانات قديمة و الإعلانات أدب مش هز كتاف، قعدت أفتكر كل إعلانات طارق نور على القناة الأولى و التانية أيام ما ماكنش فيه غيرهم و كان الواحد مقدمهوش غير انه يا يتفرج على الإعلانات يا يطفى التلفزيون. تفتح القناة الأولى تلاقى اعلانات تدير على القناة التانية تلاقى برنامج خامسة سياحة بتاع جانيت فرج. تفتح القناة التانية تلاقى اعلانات تدير على القناة الأولى تلاقى مجلس الشعب. تفتح القناة الخامسة تلاقى الولية الحيزبونة اللى اسمها عزة النشار بتاعة برنامج الأغانى الأجنبى لو فيه حد اسكندرانى هنا و يفتكرها تدير على القناة الأولى تلاقى اعلانات تدير على القناة التانية تلاقى النشرة الفرنسية ، بعد ما تتفرج على المذيعة و شعرها و لبسها ترجع تدير على الإعلانات بتاعة القناة الأولى. و على فكرة الإعلانات كانت أحسن حاجة بتيجى فى التلفزيون. أنا عن نفسى كنت بفتح التلفزيون وقت الإعلانات و اطفيه لما ييجى المسلسل. و أفتكر كان عندى واحدة صاحبتى فى المدرسة كييفة إعلانات قديمة برضه، كنا نبقى بنتكلم و تيجى كلمة بتيجى فى اعلان، تلاقينا طلعنا مرة واحدة بأغنية الإعلان.
و لو إفتكرنا الإعلانات هنفتكر أيه و لا أيه.. فاكرين إعلان لومبو مصاصة لذيذة لذاذة تمزمز مزازة لومبووووووووو اوه. طيب حد فاكر اعلان الست اللى ممدة على الشيزلونج قدام الدكتور النفسى المنكوش؟ الإعلان دة كنت بمثله انا و هناء، صاحبتى اللى قلت عليها فوق ، و كنا بنمثله بدرجة إحترافية عالية
طلب رز عملت رز طلب مكرونة برضه عملت مكرونة بص لى من فوق لتحت و ساب لى البيت
سمنك فى الأكل كتير؟
لاء
و لا قليل؟
برضه لاء
سمنك النخلتين؟
لاء
و تأتى النصيحة الجامدة:
روحى جربى النخلتين حبك يرجع فى اكلتين.
الإعلان دة من كتر تأثيره خلى جملة بص لى من فوق لتحت و ساب لى البيت تدخل فى كلامنا العادى

الإعلانات الكارتون بأة كانت فوق الممتازة. كان فيه الإعلان بتاع العيال اللى ماسكين ابوهم من رقبته و عمالين يجيبوها يمين و شمال و بيغنوا هات لنا ريرى هات لنا ريرى. اجرى بسرعة يا واد يا حسين شوف لنا ريرى بيتباع فين هات لنا منه باكو و اتنين. و كان فيه إعلان عبد الرحيم عمر و هتجوز. عبد الرحيم عمر إحتكم الأمر.
كان فيه كمان إعلان جميل أوى بتاع كوفرتينا على العريس . موافقين. يبقى هيتجوز و يهيص.و اعلانات اقراص الناموس كانت ملك تانى خالص، كان فيه إعلان ناموس عمال يقرص يا خويا مش عارف انام منه ياخويا مش عارف انام. كيتو دة اسم القرص كيتو نام . و الإعلان بتاع الولد و البنت الكارتون اللى الناموس بيقرصهم و هما بيقولوا بهرش فى ايدى آه يانا بهرش فى رجلى آه يانا هو الناموس هنا ويانا. نقول له هش مابيهشش نقول له بس ما بيبسش و بعدين بيغنوا دة ناموس غلوس بسنان و دروس. امشى يا ناموسة يا غلوسة ماتقرصنيش كيلنج اهو جالك هيفشفشك فشافيش. قرص واحد منى و الناموس يروح مايجيش. عندنا كيلنج حطينا القرص. عندنا كيلينج ماعندناش قرص .
و كان فيه اعلان اللبان السحرى اللى كان احدث ما وصلت له تكنولوجيا تصنيع اللبان وقتها. تحط المستيكة-كلمة اسكندرانى- فى بقك صفرا تطلع حمرا دوق دوق دوق أحلي هدية
السحري لبان طعمه يا جدعان مية الميةاديني لبانة من السحري....اشمعنى السحري مصر عليهجرب و هتعرف وحدك ليهالسحري لبان أندغة ألقاه ألوان ألوان يا نهار أخضرو بعد ما الأب بيدوق بيطلع بالقرار الخطير:اندغه و انا أزود في المصروف
أبدا أبدا دة ماهوش غالي و اشتري هتشوف
و كان العيال على طول يجيبوا السحرى دة و يفتحوا بقهم زى المهاطيل يوروا بعض لون اللبانة طلع ايه و اللى تلاقى لسانه ازرق و اللى تلاقى لسانه فوحلقى

و كنت احب اوى اقول الإعلان بتاع ملمع الجزم
صباح الخير يا اكسلانس (دة الملمع لا مؤاخذة بيصبح على الجزمة)
صباح الخير بس انا زعلان
مالك كدة ضارب بوز
بذمتك دة منظر شوز
و لا يهمك خش على اللمعان
براتيكو علبة ورنيش تفتح تقفل و ماتقوليش

و كان فيه الإعلان بتاع الولية اللى واقفة فى البلكونة ماورهاش حاجة غير انها تراقب جارتها فى الرايحة و الجاية تقول لها
رايحة فين يا فاطمة
رايحة اجيب اومو
جاية منين يا فاطمة
كنت بجيب اومو
فاكرة مرة شفت كاريكتير فى الدستور القديمة لما كانت بخيرها و كانت الست بتقول لجارتها
رايحة فين يا فاطمة
رايحة اجيب اومو
جاية منين يا فاطمة
و انتى مال اومك " كانوا كاتبينها كدة اومك"

الكاريكتير دة ضحكنى بهيستريا بسبب قلة الأدب اللى فيه. أه ايامها كانت اقصى قلة ادب الواحد سمعها فى الكلام جملة انتى مالك امك دى :)

كان فيه كمان اعلان معبر اوى من غير كلام كتير كان فيه راجل و ست فى حفلة و الراجل ماسك كاس حاجة اصفرا و واقف جنب حمام السباحة و الست و هى ماشية بتخبط فيه و كانت هتقع فمسكها و شمت ريحة البادى سبراى آكس و دخل دماغها فبتعدى جنبه تانى و بتخبطه قصد و إستعباط و يقول المعلق فى آخر الأعلان : آكس لأن الإنطباعات الأولى تدوووووم

كمان كان فيه إعلان شوكولاتة كادبورى أبو موسيقى حلوة دة لدرجة ان الموسيقى بأة اسمها بعد كدة موسيقى كادبورى. الإعلان كان فيه واحدة بتقعد فى كرسى ابيض و وراها ستارة لون غلاف كادبورى و بعدين الستارة تقلب على غلاف الشوكولاتة و الكرسى يكبر بقدرة قادر

و فيه اعلان اثر فى الناس اوى بتاع محمود ايه دة يا محمود؟ دى موبيليا كاربت ستى يا فاتيما. أى حد مذبهل من حاجة لغاية دلوقتى بيقول محمود ايه دة يا محمود

و كان فيه علاقة قوية بين معاجين السنان و البيض مش فاهمة ليه. كان يجيبوا البيضة و يغسلوا نصها بمعجون سنان كريست و يحطوه فى كوباية ماتفهمش فيها ايه و الصبح تلاقى نص البيضة اللى ماتغسلش بكريست طرى و النص التانى ناشف و مانفهمش ايه المنطق يعنى، كل اللى بنفهمه ان كريست معجون سنان جامد بالصلاتو على النبى

و كان فيه الإعلان الرخم بتاع فساتين فرح العبودى. الإعلان دة كان موطنه شرايط الفيديو و كان تقريبا مدته ربع ساعة و لا نص ساعة من عرض فساتين افراح غريبة الشكل بجناحات من ورا و حاجات طالعة من قفا العروسة و الأغنية شغالة بودى بودى بودى العبودى على اساس ان دى احدث ستايلات فساتين الفرح.

و مش ممكن ننسى طبعا سلسلة إعلانات الشمعدان و كمل ألبوم الشمعدان. كل واحد فى المدرسة كان معاه ما لا يقل عن خمس ألبومات و كنت بشترى الشمعدان بالعلب، أطلع الستيكرز الزقها فى الألبوم و ارمى البسكوت و ماما تزعق و انا عاملة عبده، مين عبده؟ ماتعرفش عبده؟ عبده العبيط. و قبل ما ايأس من انى اكمل الألبوم و اكسب العجلة الاقى طاهر القويرى طالع مع مراته فى التلفزيون بيسلموا جوايز البوم الشمعدان تقولش بيسلموا جوايز الدولة التقديرية، فيدينى دافع انى اشترى البوم جديد الزق فيه الستيكرز الزيادة.

و كان فيه اعلان فيبكس الكريم المضاد للعرق، عباس متأخر ع الجامعة و واخدها جرى
و فى وسط صحابه
عباس
قلع الجاكت
عباس
و يا ريته ما قلعه
ههههههههههههههههههه

و لما كان ييجى رمضان كانت حتى الإعلانات مستواها بيبقى احسن و كانت تطلع بأة اعلانات رمضان بتاعة جهينة و عند جهينة الخبر اليقين و سيراميك الجوهرة بتاع يسرا و عمر الشريف و كانوا بيصمموا يعطشوا الجيم زى العرب مش عارفة ليه، يمكن عشان يدوا انطباع بالفخامة؟ و لا اعلان لبنيتا بتاع هو ايه دة يا ثوعاد

و مع اقتراب الإلفية التانية ظهرت شبكات المحمول فطلعت علينا موبينيل بإعلان أنا بتكلم و اقول بحبك و ردت عليها فودافون بإعلان بيبو فرقع جيجى

و دخلت الألفية التانية و معاها دخلت وصلات الدش و إنتهى زمن الإعلانات الجميلة و طلعت علينا الإعلانات الخليجى السخيفة اللى فيها موديل مصرية او لبنانية ملبسينها حجاب خليجى و حاطين صوت خليجى على شريط الإعلان و طالع معاها واحد تخين لابس جلابية بيضا و بيعملوا اعلان عن اى حاجة اقراص بنادول بتاعة الصداع، حليب المراعى، لبن نيدو.
اعلان من دول بييفقع مرارتى اوى بتاع زبدة بوك باين اللى فيه الراجل النطع التخين اللى بيقول لمراته انا طالع انام فهى بتغريه يقعد بإنها تعمل له السمبوسة اللى محشية زبدة. لما بييجى الإعلان دة بقعد اشجع و لا اللى بتتفرج على ماتش كورة. بقعد اقول لها سيبيه يطلع يتخمد، اخلصى منه شوية

و الإعلان اللى بينافسه فى الرخامة بتاع الراجل النطع التانى اللى بيقول لإبنه ما فى فلادلفيا ما فى مصروف

و الإعلان اللى بيرفع الضغط و السكر و اى حاجة مفروض ماتترفعش بتاع زيت العربى لما تيجى الأم تأكل ابنها السمبوسة و تقول له طيارة طيارة و مايرضاش ياكل و بعدين لما تيجى جدته ياكل منها و يقول طيارة ماما بتنجط زيت. هو يقول بتنجط زيت من هنا و انا يجى لى كساح من هنا

و كله كوم بأة و إعلانات ديتول بأة كوم تانى خالص. لازم تستحمى بديتول. لازم تنضف بيتك بديتول. خلاصة النضافة واخدة حدها مع الناس دى، كل ما اشوف اعلانات ديتول الخليجى بقول الله يرحم

و إعلانات رز أبو سيوف تتساب لها بلاد. سيبك من إسم الرز اللى مش ماشى معاه اصلا، حد يسمى رز ابو سيوف؟ و كل اعلان اوكس من اللى قبله. آخر اعلان تلاتة خضار قاعدين مع بعض قاعدة حريمى و جوز واحدة فيهم كيس رز ماسك صورة ابو سيوف و نازل فيها ضرب قال بيقتله. إعلان ررررررررررخم و ينافسه فى الرخامة إعلان حليب المراعى بتاع المذيعة اللى بتطلع على البنات الآمنين فى المدرسة و تقول لهم حبيباتى تجبلن تحدى المراعى؟ دوجوا المراعى.
حلو؟
إيوووووووة "بالهمزة تحت الألف"

و طبعا مش هننسى إعلان اوريو الولد اللى بيعلم ابوه ياكل البسكوت ازاى. دوجها كدة غمسها كدة و لا إعلان ماكيوكونكيز وسكالاكطك بتاع كنور مايونيز.. و لا إعلان حياتك من غيرى سلطة و هى و جوزها ارخم من بعض.

فيه إعلان بأة لو يعملوا جايزة لأبوخ و أغبى إعلان إتعمل من يوم ما قالوا يا إعلانات الإعلان دة ياخدها. كان بييجى الإعلان دة فى رمضان السنة اللى فاتت اعلان برفان " ديرتى " بيطلع فيه راجل لابس جلابية بيضا و عقال و يفضل يقول شعر ، ميزة الإعلان دة إنك بإستمرار و مهما كان عدد المرات اللى شفته فيها فإنت بتنسى دة اعلان ايه إن مانستش إنه إعلان أصلا. و ماتفهمش أيه علاقة الراجل بالشعر بالبرفان يعنى لو ماكنوش وضحوا انه اعلان برفان كان الواحد هيفتكر انه بيتكلم عن مأساة الشعب العراقى الشقيق!

طبعا مصر برضه ليها نصيبها من الإعلانات الهطلة و يندرج تحت هذا البند إعلانات يونايتد جروب بتاع الجزامة الشقية و طقم الحلل اللذيذ و ماننساش إعلانات العسل الجبلى الممتاز اللى بيعالج كل الأمراض من اول العقم لغاية السكر، يا كفرة يا ظلمة مريض سكر ياكل عسل!

و اعلانات النغمات و اللوجوهات: زهقت من نغمة موبايلك اطلب النمرة الفولانية و نزل احدث النغمات زهقت من لعب موبايلك اطلب النمرة العلانية زهقت من موبايلك نفسه ارميه من الشباك و ريحنا



أحلى إعلان بأة حاليا بتاع فودافون الراجل اللى من صغره بيواجه أصعب الإختيارات و هو صغير مامته تقوله تاخد الشخليلة و لا اليويو .. يكبر شوية يتقاله تلعب الشوط الأول و لا التانى .. يكبر أكتر مراته تقوله أخيطلك الزراير و لا اكوى لك القميص .. وبعدين لما الراجل يقوله سعر دقيقة قليل و لا صلاحية أكتر؟ باحب أوى فى الآخر لما بيقول للراجل الاتنين الشخليلة و اليويو قصدى الصلاحية و سعر الدقيقة

كفاية بأة عليكوا كدة هروح اتفرج على التلفزيون و ارجع اكمل :)

18 comments:

mariam said...

كلامك بينجط سكر

تصدقى انى من مده كنت بفتكر انا و اخويا الأعلانات لما كنا صغيرين
حقيقى كان ليها طعم تانى
انا فعلا كنت بفتح التليفزيون قبل المسلسل بنص ساعه اشوف الأعلانات
و كل اعلان كان ليه موسيقى او اغنيه مميزه

لدرجة ان فى وقت ضربت معايا و قررت اطلع فتاة اعلانات
لأ متخافيش من حسن حظ الساده المشاهدين ربنا رحمهم منى

دلوقتى الأعلانات بتنجط سم
هى جت على الأعلانات

تحياتى

Unknown said...

أولاً إحنا في الألفية التالته مش التانية يا كوفي!!! عليكي واحد

ثانياً علي قد ما كان للإعلانات دور كبير في تشكيل الوجدان المصري في غياب الفن المحترم، علي قد ما دمرت الذوق بكلماتها الفجة وتعبيراتها البيئة اللي دخلت لغتنا وأصبحت جزء لا يتجزآ من مفرداتها، ده غير إنها نفخت الروح في النموذج الإستهلاكي أوي وأصبحت الطبلة والصاجات والرقص البلدي أفصح وسيلة للتعبير... الله يجازيك يا طارق يا نور

بس برضه كانت مسلية

أما بقي إعلانات اليومين دول اللي بتظهر فيها الست وهي متحجبه بالأوي مع إن المفروض إنها في بيتها ووسط عيالها فدي بتجيب لي أرتكاريا شديدة

Lemonada said...

اي دة
كل دي اعلانات متركبة ومركونة في دماغك
ههههههههههههه
ماشاء الله عليك
دي اول زيارة
بس عاوزاك ترجعي وتزوريني عشان مش عارفة تفرق اي لو كنت مصرية او لاء في البوست الي كتبتو
ممكن تكتب التعليق على الحالتين
نفسي اعرف التعليق
ممكن ؟

He and She said...

Da Kalam
Tensi e3lan shehadat estethmar el bank el Ahli wel atr elli beyor2os. tensi bardo Tefal Zahran.
bas bayen 3aliki maoso3a
This is my first time in your blog. You really made me remember those days before the Dish and internet when life was only channel 1, channel 2 and channel 5
I am so happy to be in your blog. Hope you stay 7ashshasha 3ala tool.Your blog khallani 2ool " 7amot wa arga3lek ya Masr
Sorry I have no arabic keyboard.

The Alien said...

موتيني م الضحك
أنا إفتكرت الإعلانات دي معاكي واحد واحد
بس كان فيه واحد كمان كنت بحبه
بتاع مبيد الحشرات
لما كان يطلع راجل لطيف يقول:
فليت .. ينتشر وينطلق ويستمر ويقتل .. ويستمر ويستمر

أكيد الإعلانات دي سايبا فينا حاجات لدلوقتي
وأكيد كتير منها مش هيموت عشان لسه موجود ف كلامنا

إعلانات الخليج دي مسخرة
عمري ما شفت إعلان بيتكلم عن المنتج نفسه
يعني أشوف الإعلان وألاقيهم ف اﻷخر بيعلنوا عن حاجة تانية خالص وغير متوقعة
سيبك إنتي المصري مفيش أظرف منه

تحياتي

Nani said...

السلام عليكم
يخرب عقلك يا بت : )
كل ده كبت جواكي فدفدي يا حبيبتي
انا الي بموتني ويفرسني دعاية فير اند لوفلي
يعني مينفعش الواحدة تبقى جميلة الا ازا كانت بيضة؟
لا وايه بقى تبصي عليها لما كانت سمرا مكشرة وكل ما فتح لونها تبتسم اكتر
ايه العنصرية دية
ونفسي بجد اضرب الراجل بتاع فيلادلفيا
ما في فيلادلفيا ما في مصروف
يعني هوا العيل الي هيصرف عالبيت وابوه من دلوقت
وكمان حاجة فكرين البرامج بتاعت صفاء ابو السعود والاغاني الهايفة بتاعتها؟
بقى دي صوتها بضرب في نخشيش ام دماغي من جوا وببقى عايز اخنقها

mary victor said...

و الله و الواحد إتشهر و بأة فيه حد يعبره :)

mariam
فعلا الإعلانات كانت حاجة متميزة زمان، رغم ان ماظنش ان الإمكانيات كانت زى دلوقتى، بس تحسى إن بتوع الإعلانات كانوا بيشغلوا دماغهم و بيفكروا و كان فيه إعلانات من حلاوتها بتستنى إنها تيجى
فيه إعلان كدة اليومين دول بس بييجى قليل أوى بتاع الولد الصينى الصغير اللى بيعمل إعلان جليد اللى فى الحمام دة
مفهوش كلام و قصير بس معبر موت
---------------------------------





Hassan El Helali
يا عم ألفية تانية ألفية تالتة خلينا فى المضمون الإعلاناتى العميق :))

"ثانياً علي قد ما كان للإعلانات دور كبير في تشكيل الوجدان المصري في غياب الفن المحترم، علي قد ما دمرت الذوق بكلماتها الفجة وتعبيراتها البيئة اللي دخلت لغتنا وأصبحت جزء لا يتجزآ من مفرداتها، ده غير إنها نفخت الروح في النموذج الإستهلاكي أوي"

بص بأة فجة استهلاكية بلا أزرق، بحب الإعلانات برضه:)
انا هقول لك حاجة
الإعلانات اللى انا قلتها دى بالنسبة للجيل اللى اتولد فى التمانينات و بالتحديد من 80 ل 85 بتمثل جزء كبير اوى من ذكرياته التلفزيونية
ادخل على الفيس بوك هتلاقى موضوع مفتوح لإعلانات التسعينات و كل اللى رد مبسوط لأنه لقى حد فاكر نفس الحاجات اللى هو فاكرها
فيه احساس بالحنين للفترة


"وأصبحت الطبلة والصاجات والرقص البلدي أفصح وسيلة للتعبير"

فكرتنى بإعلان هاتى ياختى بسكو مصر و لا عجن و خبز و مش عارفة ايه و نتيجة حسب الحظ
كان فيه طبلة كتير
مش بغيظك و لا حاجة على فكرة :)

بنبنسط أوى لما الاقى رد ليك عندى
ابقى تعالى كتير

Unknown said...

غالية (ودمك خفيف) والطلب رخيص
آجي أزورك كل يوم... بس إنتي إتحفينا بالجديد

mary victor said...

Lemonada
ليمونادة عندنا يا مرحبا يا مرحبا
"بس عاوزاك ترجعي وتزوريني عشان مش عارفة تفرق اي لو كنت مصرية او لاء في البوست الي كتبتو
ممكن تكتب التعليق على الحالتين"

هى مش هتفرق فى كون البوست حلو و رائع جدا
لكن تفرق فى إستقبالى انا للبوست
يعنى انتى لو حد مصرى و كاتب كلام كويس فى حق المصريين فدة عادى رغم ان البوست برضه رائع و لو إنتى مش مصرية فدة يدى للبوست ميزة زيادة فوق كتابته الحلوة. أنا اللى لخبطنى إنى حسيت انك مش مصرية و بعدين لقيتك حاطة الأغنية بتاعة ماشربتش من نيلها و بعدين بتكتبى بالعامية المصرية فلخبطينى يا ليمونادة :)


----------------------------


He & She

تصدق مش فاكرة الإعلانات اللى انت قلت عليها دى خالص ، معقول فيه إعلانات انا ماذكرتهاش؟

You really made me remember those days before the Dish and internet when life was only channel 1, channel 2 and channel 5"

اه كله كوم و تشانل فايف دى كوم تانى يا خويا، فاكر عزة النشار بتاعة الأغانى الأجنبى و لا الست دى كانت بتطلع فى تلفزيوننا احنا بس؟



"
---------------------------


The Alien

"بس كان فيه واحد كمان كنت بحبه
بتاع مبيد الحشرات
لما كان يطلع راجل لطيف يقول:
فليت .. ينتشر وينطلق ويستمر ويقتل .. ويستمر ويستمر "

حرام عليك دة كان راجل لطيف؟
بس على فكرة دة برضه من الإعلانات ذات البصمة، لغاية دلوقتى لما بحب أعلق على حاجة رخمة بقول "و ينتشر و يتوغل و يستمر و يستمر"


"إعلانات الخليج دي مسخرة
عمري ما شفت إعلان بيتكلم عن المنتج نفسه
يعني أشوف الإعلان وألاقيهم ف اﻷخر بيعلنوا عن حاجة تانية خالص وغير متوقعة"

آه اعلاناتهم حاجة من اتنين، يا متفهمش دة اعلان ايه يا الإعلان مباشر بطريقة سخيفة، مفيش اى افكار
و فى الحالتين الإعلان يتسم بالسماجة و تقل الدم الغير الطبيعى
انا ساعات بقعد اضحك بهيستريا على اعلاناتهم من سخافتها

---------------------------------

mary victor said...

nani

"انا الي بموتني ويفرسني دعاية فير اند لوفلي
يعني مينفعش الواحدة تبقى جميلة الا ازا كانت بيضة؟"

دة تطبيقا لفلسفة البت بيضا بيضا بيضا البت بيضا و انا اعمل ايه
انتى شكلك مالكيش فى الفلسفة :)

اعلانات فير آند لافلى دمها زى السم و مفيش فيها اى تجديد او ابتكار و عبارة عن مشاهد مكررة بنفس الترتيب فى كل الإعلانات
مشهد واحد: البنت عايزة تبقى مذيعة او عارضة ازياء
مشهد اتنين: اللى هيمتحنوها رافضينها عشان سمرا
مشهد تلاتة: مامتها او صاحبتها تطبطب عليها عشان تعزيها فى مصابها الأليم و تديها انبوبة الكريم
مشهد اربعة: خمس ست صور للبنت بدرجات لون مختلفة من الأسمر وصولا للبياض الشاهق
مشهد خمسة: تروح تقدم تانى و الناس يذبهلوا لما يشوفوها و اخيرا الحياة هتزهزه يا جدعان
البنت بقت بيضا و كل مشاكلها اتحلت



"ونفسي بجد اضرب الراجل بتاع فيلادلفيا
ما في فيلادلفيا ما في مصروف
يعني هوا العيل الي هيصرف عالبيت وابوه من دلوقت"

لاء شكلك مفهمتيش الفكرة
هو الراجل الغلس مش عايز ابنه يجيب الجبنة من جيبه، هو بس عايز الجبنة تبقى موجودة فى البيت، فيه جبنة يديلوه مصروف، ماجبش الجبنة مفيش مصروف
حاجة كدة نظام أبجنى تعرفنى
السؤال هنا: مايعديش ليه هو على السوبر ماركت و هو مروح من الشغل و يجيب جبنة لنفسه؟
لما انتو مش اد الخلفة بتخلفونا ليه
:)))


"وكمان حاجة فكرين البرامج بتاعت صفاء ابو السعود والاغاني الهايفة بتاعتها؟
بقى دي صوتها بضرب في نخشيش ام دماغي من جوا وببقى عايز اخنقها"

يا صحابى و صحباتى هنا و محالك سر
بصوا و شوفوا حاجاتى انما ايه فى السررررر
عندى صابونة شقية
اخيييييييه يا ريتك ما فكرتينى

كانت لازم الأغنية الغبية دى تيجى كل يوم الصبح فى برنامج دنيا الأطفال

و الأغنية الغبية التانية و هى عاملة عيلة و راكبة العجلة
بس الحمد لله دى كانت جرعة مخففة بتيجى فى العيد بس

العيد فرحة
يا سلام
و اجمل فرحة
خلاص عرفنا
يجمع شمل قريب و بعيد
سعدنا بيها

دى كنت بسمعها بأة سعد نبيهه
على اساس ان فيه واحد اسمه سعد و امه اسمها نبيهه و بينادوا عليه بإسم امه

islamz said...

يااااا .. والله لما قريت بوستك ده رجعت ورا وافتكرت الاعلانات الحلوة على الرغم من بساطتها .. فى قاعدة بتقول more simple more effective .. ومعناها
ان كل ما الاعلان كان بسيط كل ما كان تأثيره اقوى .. وفعلا الاعلانات دى معلقة معانا لحد دلوقتى ..

بس تعالى هنا قوليلي انتى افتكرتى كمية الاعلانات دى كلها ازاى ;)

بوست خفيف وجميل .. تحياتى

Doba said...

حقيقى حقيقى ما شاء الله عليكى

مموتانى انا وصحبتى من الضحك على كم الاعلانات اللى فكرتينا بيها اللى تفطس كلها من الضحك ولقينا انها عبارة عن معتقدات مترسخة ومستخبية ومتأصلة فى عقلنا الباطن

مدونتك جميلة قوى ودمها خفيف جدا
تحياتى
هبة

Anonymous said...

يخرب عقلك
انا بردوا كنت بسمع اغنية صفاء ابو السعود بتاعة العيد كنت بسمعها سعد نبيهة
انتى حليتى اللغز
واقول مين سعد ونبيهة دول
:)

OPAZ said...

يا خراشى
أما حتة بوست سكككككككككر
أنا أصلا كنت بدور على اعلان لبان السحرى و لقيت ده فى النتائج
انتى جمجمة يا بنت بس نسيتى اعلان شاى البراد الأزرق وسافو والبنت أم شعر أصفر دى وعنيها خضراء واسمها ياسمينا فكراها؟ كانت بتيجى فى كل الاعلانات

Amenhotep®© said...

ههههههههههههه,ده من أجمل البوستات اللي قريتها علي النت,فكرتينا بأيام زمان,زيت حوا ليكي يا جوا خلي شعرك يتقوي

Unknown said...

أنا قريت كذا مقالة فى البلوج و أشكؤك على الأبتسامات و الضحكات و كمان التأثرات اللى حسيت بيها ... انتى دمك خفيف و موهوبة فى التعبير عن أحاسيسك و ياريت تستمرى فى البلوج على طول ... بالنسبة لمسح البلوجات أفضل انك متمسحيش حاجة كتبتيها لكن ممكن تكتببى مقال جديد و تقول فيه ى انك عاوزة تمسحي البلوج الفلانى أو اعتبونى مقلتش الكلام ده أو أى حاجة بالمعنى ده لأن ده يخلينا نتعرف أكتر على جوانب شخصيتك ... فيه اعلان انتى أكيد مشفتيهوش بس لو سألتى حد فوق الأربعين ممكن يحكيلك عنه "ياكلوا حلاوة ياكلوا جاتوه ... ياكلوا كل اللى يحبوه ... والتسويس ؟ أنا معجون مخصوص علشانهم أنا معجون يحفظ أسنانهم أسمك ايه؟ معجون المعاجين (اسم المعجون اللى مش فاكره للأسف) بالفلورين"

Unknown said...

أفتكرت اسم المعجون ... أرتف :)

ما اعظم اعمالك يا رب said...

دمك شربات
بس انتي نسيتي اعلان جيلي كولا رسمة ازازة بتاع ياسمين عبد العزيز ده كان لذيذ و له اعلانات البلهارسيا يااااااااااااااااه فظيعة
انا عايزة ابقي صحبتك بليز
انا بموت في اسكندريةو احنا مسافرين من القاهرة ليها اول ما بس نقرب منها بحس براحة نفسية رهيبة