سؤال عميك خطر على بالى بعد ما قريت البلوجاية اللى قبل دى، قريت مش كتبت لأنى أصلا نقلاها من بلوج تانى
لو عايز تقرا البلوجاية نفسها حط صبعك على السكرول بتاع الماوس و انزل
انزل
انزل كمان
"شعب حلاليف"
بسسسسسس أهيه
اقرا و إرجع لى و لما ترجع ابقى قول لى
رجعت؟ طب و انا مالى
طيب خلاص من غير مد إيدين و قلة أدب
الحكاية عن سوء فهم حصل بسبب سواق تاكسى مسيحى حاطط إنجيل فى التاكسى على سبيل البركة يعنى
و هنا يبرز سؤال من دماغى الحجرى المنعدم الفهم
ليه الناس بتحب تحط أناجيل و مصاحف فى العربيات؟
أيه المعنى يعنى؟
هيقعد يقراه فى العربية؟
ماظنش ما هى ماحبكتش
يبقى حاطه عشان البركة
طيب يبرز سؤال تانى من دماغى الحجرى المنعدم الفهم
هى البركة بتاعة الحاجات دى فى الكتاب نفسه ككتاب عبارة عن غلاف و ورق و كتابة؟
و لا من الكلام المكتوب جوا؟
أكيد من الكلام المكتوب جوا
طيب هى بركة الكلام المكتوب بتبان فى كونه كلام مكتوب و لا فى الأثر اللى بيأثره فى حياة الواحد و يلمسه الناس اللى بيتعاملوا معاه؟
اكيد بتبان فى الأثر
طيب ليه لييه لييه الناس بتحب تحط اناجيل و مصاحف فى العربيات؟
نوع من إثبات التدين و إن الراجل خلاص مبهدل الدنيا تقوى و ورع؟
طريقة لقول "أنا راجل بتاع ربنا و أحسن منكم يا كلاب" و لو سواق تاكسى يبقى إياك تفاصل معاه فى الأجرة لأن التقى الورع دة مش هيسرقك يعنى لو حاولت تفاصل هتسمع من المنقى يا خيار و كوسة و كل اللى يعمل يخنة محترمة
و دة فكرنى بنكتة قريتها من سنة بتقول إنه إبليس قرر يلم هدومه و يرحل عن مصر، الناس راحت تترجاه يقعد و قالوا له إحنا لينا مين غيرك
قال لهم إنتو عالم كدابة، الواحد منكم يجى لى شحات و معفن أنضفه و بعد ما ينضف يمسك سبحة و يحط ورا مكتبه لوحة مكتوب عليها
هذا من فضل ربى
18 comments:
يابنتي إحنا أخرنا كدا
نحط الإنجيل والمصحف ف العربية
ندق صليب ع الإيد
نرزع زبيبة ع الوش
قال ويقلك شعب متدين
حلوة النكتة
تحياتي
ضحكتنى اوى النكتة الاخيرة .. بس احنا فعلا شعب اتعود على الحلفان .. دى حقيقة
:]
عندك حق تماما ,مشكلتنا بجد اننا فعلا مابقناش بناخد حاجه في دينا غير بالظواهر فقط لا غير ووضع المصحف او الانجيل ما هو الا مثال بسيط على كدا لمظهر من المظاهر دي
تلاقي كل واحد متشدد وماسك في الي بيقدر عليه مش اكتر
يعني لابسه خمار وقال الله و الرسول و هيا نماماه وغشاشه وعبر الدنيا فيها
مربي دقنه و ذبيبة الصلاه قد كدا و تلاقيه مستغل و حقود و اناني , بس الظاهر انما الداخل فين؟؟ فين الي خلقه الاسلام ؟؟ فين الباطن الي اقوى مليون مره من مظهر للناس و خلاص
نقول ايه بس
بوست واقعي و في الصميم
تحياني:)
شعب مظااااااااااااهر و حركاااااااات و بس
السلام عليكم
لا بجد بلوج جامد جدا جدا جوا في الجون
ده انا مت من الدحك يا لهوي عندك اسلوب جنان
مانا لو قلت لماما اعمل لنا اكل غير عضوي هلاقي عندي اعضاء حيوية ناقصة
بجد مش طبيعية
وكمان حتة ردك على السعودي المتخلف روحو بخروا الصحرا
يا لهوي دنتي عسل مش بكدب والمصحف ده
على فكرة انا مبحلفش ومبحبش الي بحلفوا والي يحلف بالقران سمعت انه مكروه او كفر لان الحلفان فقط بالله وللاشياء الي فعلا عليها تطير رقاب رجالة بس
تحياتي ليك : )
بجد.. أحلى بلوج دخلته
باين دمك خفيف
النكتة جامدة
بس بلاش النكت اللي ليها علاقة بالدين
لأن فيها إساءة أو تريقة
هتقولي غير مقصودة طبعاً
مصدقك من غير حلفان
***
بالنوسبة للأخ اللي فوق
مش عارف اقرا إسمه
عايز أقوله ان الصليب بيتدق
لكن الزبيبة مش بتتزرع ياخفيف
دي سيماهم علي وجوههم من أثر السجود
ولو ربنا بيحبك كان طلعتلك
ياما في ناس بتصلي وماتطلعلهاش زبيبة
The Alien
islamz
Rosa
enas mossa
nani
نورتونى يا جماعة بجد. معلش مش هقدر أرد على كل واحد برد منفضل مش قلة تقدير ليكم لكن لأن فعلا قلت اللى عندى فى الموضوع دة و شايفة انكم متفقين معايا
تعالوا زورونا باى باى
beeboo
مين قال لك ان النكتة غير مقصودة؟
النكتة مقصودة يا فندم و انا مش شايفة ان لها علاقة بالدين
النكتة معناها المباشر ان الواحد بيعمل ما بداله و يسرق و يرتشى و بعدين يقول الحمد لله و ربنا ادانى فى حين ان ربنا مالوش علاقة بالموضوع
"لكن الزبيبة مش بتتزرع ياخفيف
دي سيماهم علي وجوههم من أثر السجود
ولو ربنا بيحبك كان طلعتلك"
همممممم نظرية مثيرة للإهتمام
يعنى كدة ممكن نقسم الناس إلى اتنين كاتيجورى
الكاتيجورى الأولانى اللى ربنا بيحبه، و دة يتميز عن غيره من فصيلة الإنسان بإن عنده زبيبة
الكاتيجورى التانى اللى ربنا مش بيحبه و دة معندوش زبيبة؟
بس حقيقى نورتنى خطوة عزيزة يا بيبو
سوري كافي
النكتة ليها علاقة وثيقة بالدين
يعني إبليس - هذا من فضل ربي
ده كلها مصطلحات دينية
وممكن حد يفهم ان فيها سخرية من الدين
يا جماعة ممكن الواحد يقول لفظ يوديه جهنم وهو مايقصدش
***
وبعدين ماينفعش
The Alien
يتريق ع الزبيبة
وأي واحد مسلم كان لازم مايعجبوش التريقة دي
ما اسمهاش زبيبة
ربنا قال عليها
سيماهم في وجوههم من أثر السجود
واحنا نقول واحد زارع زبيبة
يا جماعة عيب
وعيب كمان الدفاع عن وجهة نظر غلط
اللي عنده صليب غير اللي عنه أثر في وجهه من أثر السجود
بدون الدخول في مقارنه بين الاتنين
***
بالنوسبة للكاتيجوري
انا مش بصنف الناس فئات
لكني بحترم جدا أي واحد
أكررها اي واحد عنده علامة صلاة في وجهه
لأن دي علامة الالتزام في الصلاة
ومايصحش نتريق ع اللي بيصلي كمان
علي فكرة أنا ماعنديش علامة صلاة
وبعتبر إن ربنا لو بيحبني
كان طلعتلي علامة صلاة
بتهيأ لي من حقي اعتقد الاعتقاد ده
باي
عزيزتى
وانتى بتحطى صورة ممثل ليه فى حجرتك هو هيخرج ويكلمك
انتى ليه مش عارفة ان وجود الشئ ده ممكن يمنع انسان عن حاجات كتير
وان الورق ده ممكن يكون جواه بركة بجد
يمنع علينا حاجات كتير
حتى لو مش صحيح ايه اللى هنخسره لو عملنا كدة
اما الشيطان ليه زعلان
دول بيقولوله انك مهما هتدينا مش هنشكرك انتا لانك مش انتا اللى ادتنا اللى خلقنا هو اللى ادانا حتى لو عن طريقك
تحياتى
سلام
beeboo
"يا جماعة ممكن الواحد يقول لفظ يوديه جهنم وهو مايقصدش"
مع كامل احترامى لرأيك يا بيبو و لكن معتقدش ربنا يحاسب حد على حاجة مش فى نيته لأن ربنا اكبر من كدة
"وبعتبر إن ربنا لو بيحبني
كان طلعتلي علامة صلاة
بتهيأ لي من حقي اعتقد الاعتقاد ده"
من حقك تماما عشان كدة مش هرد عليك تانى بخصوص النقطة دى
نورتنى يا فندم ماتقطعش الزيارة :)
احساس لسه حى
مين قال لك انى بحط صوة ممثل فى اوضتى!!
ثم ماينفعش نقارن صورة ممثل فى الأوضة بإنجيل او مصحف فى العربية
لأن اللى بيحط صورة ممثل فى الأوضة حاطه روشنة و عارف ان آخرها ان صحابه هيقولوا عليه واد روش و رايق
لكن اللى بيحط انجيل او مصحف فى العربية بيعملها من باب انه يظهر بصورة المتدين الورع و اخطر انواع النفاق لما بيوصل للدين
"وان الورق ده ممكن يكون جواه بركة بجد
يمنع علينا حاجات كتير"
صح، بس فين البركة؟ فى الكتاب نفسه ككتاب و لا لما بقراه و اطبقه فى حياتى؟
من وجهة نظرى أهمية الكتب المقدسة مش فيها كجماد هحطه فى العربية او فى البيت، أهميتها فى الروح اللى جواها و الروح دى مش بتطلع غير بالممارسة العملية للكلام اللى جواها
"اما الشيطان ليه زعلان
دول بيقولوله انك مهما هتدينا مش هنشكرك انتا لانك مش انتا اللى ادتنا اللى خلقنا هو اللى ادانا حتى لو عن طريقك"
:))))))))))))
مش دة المقصود بالنكتة
المقصود بالنكتة ان الناس بتستخدم طرق مش كويسة عشان تتغنى و بعد ما تتغنى تروح تتمسح فى ربنا و ترسم التدين
شكل من اشكال النفاق مش عشان تغيظ الشيطان يعنى
نورتنى يا فندم
كلامك جميل يا بينتي و الله
لا و ان محطش المصحف في التاكسي يخاف ممكن يتسرق و هوا الركعة مبيسجدهاش
وتلاقي بتوع المحلات يقفلوا و يحطو المصحف في وش الباب عشان يأنبو ضمير الحرامي
و الحرامي يا عيني يسرق و يلم و ضميرو بيأنبو :)))))
ما خلاص سرق لازم نعذبو يعني
بوست حلو بجد و مدونة اجمل
سلام مؤقت
أنا ملاحظ إن روح النكته آصبح في حالة إضمحلال عند المصريين... مع إن أهم صفة فينا كانت خفة دمنا وتريقتنا علي كل حاجة حتي علي نفسنا... فكوها شوية يا جماعة وحياة النبي... أوبس! أنا كمان باحلف؟
مش روح النكتة اللى فى حالة إضمحلال لكن روح التشنج فى أى حاجة تخص الدين هى اللى فى حالة إنتعاش
يعنى ممكن تقعد واحد جنبك تفضل تقول له نكت حشاشين و صعايدة و نكت قليلة أدب لو حبيت مش هيقول لك حاجة
لكن قبل ما تتكلم كلمة فيها ريحة الدين بس لازم توزن كلامك بميزان الدهب لا تبقى كافر ابن ستين...
و دة برضه من مظاهر النفاق الدينى
ظريف جدا البوست دة وجميلة المدونة فعلا واتمنى ان نصبح على تواصل
مدونتك جميلة
بس مفيش فايدة
زبيبة .... زبيبة... زبيبة
- الاخوان بيدافعوا عن الزبية ويعتبروها سيماهم في وجوههم - سؤال: هل الزبيبة في الوجه ام في الجبهة ؟
سيماهم في وجوههم يا مغفلين يعني نور ... ضياء .. راحة... جمال...
مش زبيبة يامرضى
الزبيبة دي سمة مرض جلدي شبيه بالصدفية
واصبحت في هذا الزمان الذي انقلبت فيه المعاني - سمة الصالحين - الذين يحلفون لأتفه الاسباب مع العلم ان الله قال لهم في القرأن - ولا تجعلوالله عرضة لأيمانكم - هؤلاء المجانين جعلوه عرضة لأيمانهم واشمالهم واتفاههم وخلاص بقه.
Post a Comment