Tuesday, October 30, 2007

مش مبسوطة

مخنوقة اوى و قرفانة و مضايقة
عارف الشعور دة لما تحس ان مفيش حاجة واحدة توحد ربنا كويسة فى حياتك؟
و يقعد الناس يقولوا لك احمد ربنا انت بتشتغل غيرك مش لاقى شغل
احمد ربنا انت بتتكلم و جسمك صحيح و مش عيان غيرك بيعانوا
احمد ربنا اهلك عايشين
احمد ربنا ليك سقف
اوكى حامدة ربنا، يمكن مش من القلب يعنى لأن لو من القلب كان زمانى مبسوطة بس دة كلام لازم اقوله باللسان
بس حاسة ان مفيش تقدم فى حياتى
عندى خمسة و عشرين سنة و اشتغلت فى اربع خمس مدارس و ماستمرتش فى واحدة فيهم لأسباب متعددة و المدرسة اللى فيها دلوقتى راهبات و ماتعرفش شغل الراهبات عامل ازاى غير لو اشتغلت معاهم
قرف قرف قرف إلى أقصى درجة
شغل مستمر بلا إنقطاع على عدد عيال كبير و عايزين منك أقصى درجات الإهتمام و لا كأنك بتشتغل فى انترناشونال سكول و بتقبض بالدولار
قواعد و قوانين و قوانين و قواعد و لا كأنك تلميذ عندهم فى المدرسة
حرقة دم و تدخل مستمر من اولياء الأمور فى الكبيرة و الصغيرة لدرجة ان بيبقى على لسانى اقول للواحدة فيهم ما تتفضلى معانا فى الفصل
و بعد كل دة
بعد كل دة بأة
مرتب بصرف عليه عشان اكمل الشهر
و فقدت قدرتى القديمة و شجاعتى على إنى أمشى لما المكان مايعجبنيش رغم انه اغبى و اسخف مكان اشتغلت فيه
بقول مادام كله مش عاجبه الوضع و قاعد اشمعنى انا اللى همشى
انا عارفة انى لو مشيت هلاقى شغل فى مدارس احسن فى المستوى و المرتب بس بقيت مترددة فى اتخاذ القرار و زهقت من التنطيط و نفسى ابقى قديمة فى مكان
مش على طول بيجربونى و بيشوفونى
و اللى اوكس من اللى فات بأة يا اخويا عريس شفته امبارح
عارفين نوع الناس دة اللى عايز يتباس و يتحط على جنب؟
هو من النوع دة بس لو قدرت تبوسه اصلا
انا مش بتاعة شوفان عرسان و الهجص دة، انا اهو خمسة و عشرين سنة بس اول مرة اروح اتفرج على عريس، انا كل اللى اتقدمولى كنت اعرفهم معرفة مسبقة ، شايفاك بلاش الحركات دى
المهم قاعدة مع البت مرات عمى، اصلها اكبر منى بخمس سنين
قالت لى ان صاحبتها ليها جوز ليه زميل عنده 30 سنة و بيدور على عروسة و اها عايزة تقول لى من شهر و خايفة منى و ماما مكتئبة و تعالى نتفرج مش خسرانين حاجة طب شوفيه و قولى لاء الخ المعزوفة المصرية العتيقة
معاه ايه يا عمتى رشا؟
بكالريوس تجارة
كام سنة يا حاجة
30
قلت لها طيب عشان ماما بس انا رايحة جبران خواطر و مش موافقة عشان نبقى واضحين مع بعض بس
اوكى
الميعاد امتى يا اخويا؟
الساعة 2 الضهر
و ربما يقول قائل و من امتى يا كوفى بتنزلى الضهر تقابلى حد؟ اقول للقائل مجبر اخاك يا قائل يا خويا، قالوا لى شغله الساعة اربعة
فين الميعاد؟
فى الكنيسة
طيب يلا يلا
و بس قلعت لك النضارة و ضربت اللينسز و فرشتين اكديه و فرشتين اكديه
و ربما يقول قائل و لما انتى مش موافقة يا كوفى بتحطى فرش ليه و لينسز و بتاع؟ اقول للقائل لأن دة منظرى قدام عامة الشعب يا قائل و مايرضيكش برضه اختك تترفض، احنا بنرفض بس
المهم
اتنين و عشرة رحنا لقينا زميله دة اللى هو جوز صاحبتها
هاى يا معلم
و اديها كلام على التعليم فى المدرسين فى شكاوى من المدارس و بعدين لقيت الراجل بيوطى صوته و ميل عليا على اساس انه هيقول كلام جامد و خطير
بصى يا كوفى امجد معاه معهد فنى صحى
و هنا ترارارارارااااااااا نزل على رأسى طيور السماء كلها و فراخها و بطها كمان
رفعت حواجبى و هزيت راسى بمعنى ان عظيم انا طول عمرى نفسى اتجوز واحد معهد فنى صحى زى ما انتو عارفين
بس انتى عارفة التعليم مش كل حاجة و بعدين دة ابوه مهندس
و انا اهز راسى بمعنى واو يعنى، بس من جوا بقول ايه الفاشل دة ابوه مهندس و هو معهد فنى صحى
بس انا اعرفه حلو اوى و واد راجل
و انا ارفع حواجبى لدرجة انها عليت عن منابت شعرى نفسها
ياااااه و كمان راجل؟ كل دى مميزات يا شيخ؟
تخيلوا اتجوز واحد عشان راجل؟ مع ان مفيش ستات بيتجوزوا رجالة اليومين دول
و بعدين شقيان
و انا موتى و سمى يا مؤمن الكلمة دى، بشم فيها ريحة عرق ليه ماتعرفش
المهم كان الموضوع اتقفل بقفل مفتاحه مرمى فى المحيط خلاص بس واقفة أدبا يعنى عشان رشا و الراجل اللى راح عزمنا على بيبسى من كانتين الكنيسة، هى اينعم ماكنتش بيبسى ماكس بس اهو يشكر برضه
واقفين و بنتكلم
و بنتكلم و واقفين
و انا بأة هموت خلاص
و الراجل محرج و بيقول معلش اصل جاله تفتيش فى الشغل و مفاجىء و كدة
و انا ساكتة مش عايزة اتكلم عشان لو اتكلمت هعضه و النعمة
و انتى بأة ماتتكسفيش لما ييجى
قلت له اتكسف مين؟ انت باين عليك مابتاكلش كرانشى . مايتكسفش هو بس و اتبعتها بضحكة سمجة
الساعة بأت تلاتة إلا ربع
و قررت انى مفروض اتنرفز بأة
قلت لها يلا يا رشا
ايه يا انسة كوفى معلش عشان خاطرى
قلت له بص اولا ماحدش يدى ميعاد يشوف عروسة بين الشغل و بعضه، ثانيا تفتيش مش تفتيش دى مش مشكلتى و مش انا اللى هستناه و لو كنت وقفت كل دة عشان ماحرجكش و لا احرجها
طيب ثوانى بس انا هكلمه
الو انت فين؟ على البحر؟ السكة زحمة؟ طيب بسرعة
على البحر؟ جاى فى مشروع على البحر يا معفن

طيب انا هطلع استناه برة

الراجل مشى من هنا و قلت لرشا بقولك ايه يلا بلا قرف، معهد فنى صحى؟ هى ناقصة؟
انا ماكنتش اعرف صدقينى و جانيت قالت لى بكالريوس
قلت لها جانيت دى شكلها حمارة، مش متأكدة ماتتكلمش و اللى خلانى مش موافقة عليه و انا فاكراه بكالريوس هوافق على معهد صحى
قالت لى طيب ندخل نصلى و نروح و انا معاكى فى اللى بتقوليه
دخلنا صلينا و طالعين من البوابة اللى برة لقيت لك ايه
اييييييييه
ايييييييييييه بأة
جثة طويلة ضخمة ترتدى اللون البيج اللى كنت بحبه لغاية امبارح الساعة 3 الضهر
قميص بيج على بنطلون بيج، صبع طباشير زى الفل و النعمة
و شعره مش مقصوص و مموج للأعلى شبه فيدو ديدو
و ممزوج بالكثير من الخصل البيضاء على اساس هيبة و بتاع
و هو جاى علينا رشا قالت لى " دة جميل خالص اهو " ههههههههههههه
انا بأة لما تحطنى فى الضحك بيبقى الموقف انتهى ، قعدت اضحك هو افتكرنى بضحك انبساطا و اعجابا باللوك بتاعه و كدة فإتنفش بأة و اتبسط
و احنا داخلين قلت لرشا
اياكى تمشى و تسيبينى معاه
و هى تقول لى حاضر
و هما 5 دقايق عشان جوز صاحبتك و تقولى انك سايبة بنتك فى البيت
و هى تقول لى حاضر

المهم دخلنا وقفنا فى الحوش
و الراجل جوز صاحبتها قال انا هروح احاسب الكانتين
و وقفنا انا و هو و هى
انا ساندة على عربية و مدياله قفايا يتفرج عليه
و رشا تقريبا كانت لسة مكتشفة ان فيه سما و بيبقى فيها سحاب و كدة فقعدت تتأمل فيها بإنبهار عظيم
و هو واقف زى الدهل
شوية و رجع الراجل
يقوم يقول له ايه يا مؤمن؟
كنت بتحاسب الكانتين؟
و انا موتى و سمى السؤال الغبى، ما هو لسة قايل لك انا رايح احاسب الكانتين
قامت رشا قايلة معلش عشان سايبة ناردين فى البيت
سلام سلام

روحنا و شوية و كلمتنى
اسكتى دة مبسوط اوى و فرحان
قلت لها اه بس انا مش فرحانة للأسف فيقدر يبقى يفرح مع نفسه

بس و من ساعتها عندى اكتئاب حتى نمت امبارح الساعة عشرة، و ماما فرحت انى هنام بدرى
قالت لى هجيبهولك كل يوم عشان ينيمك بدرى
عاااااااااااااااا

Sunday, October 21, 2007

مسخرة و النعمة

مسخرة لبعد بكرة خصوصا بالتعليقات بأة أيه ماقولكوش :)))

Friday, October 19, 2007

شعب عايز يتربى


و أنا بتفسح بين المدونات شفت لك التدوينة دى و عجبتنى موت و بعد ما كتبت كومنت لقيت إن الكلام ينفع بوست مستقل، إقرا البوست اللى انا قريته و بعدين كمل على تحت

لاء احنا مش مقبلين على مرحلة سيطرة الإخوان
احنا بالفعل فى مرحلة سيطرة الأخوان و الإخوان جايين جايين
و الناس حاليا مقسومين نصين
نص عبيط بيحب الإخوان عشان نظام قال الله قال الرسول و فاكرين ان الدنيا هتبقى بمبى لو الإخوان مسكوا الحكم مش عارفين انها هتبقى بمبى مسود
و النص التانى و هو النص الأعبط من النص الأولانى و بيؤيد الإخوان نكاية فى الحكومة و من باب حرية التعبير و الديموقراطية و نجرب إلخ
النص التانى دة أوضح مثال له الدستور فى إصدارها التانى، بدأت السنة اللى فاتت أيام إنتخابات مجلس الشعب بتأييد الإخوان على خفيف و شوية و بأت بالمفتشر كدة
مش عارفين إن الشتيمة اللى مبارك كان سايبهم يشتموها فيه و فى إبنه مش هيعرفوا يقولوا نصها و لا حتى بم فى وش الإخوان لو مسكوا الحكم من باب إحترام أولى الأمر منكم و بدل ما الحكم على واحد زى ابراهيم عيسى غرامات و حبس هيظبطوه بكام جلدة عشان يفرح بالديموقراطية لأن ببساطة الديموقراطية ماتنفعش مع العالم دى.. الديموقراطية بالنسبة لهم ون واى أى إنهم يمارسوا حريتهم هما بس و الحرية بالنسبة لهم حريتهم هما بس يعنى أحرار يلبسوا الحجاب لكن احنا مش أحرار اننا نقلعه.
وجهة نظرى الخاصة و اللى ممكن كتير يعارضنى فيها إن الحكومة الحالية حرامية أينعم لكن على الأقل فيه بقايا حرية، و أنا أتذمر على اللى موجود لو الأوبشن التانى أحسن لكن المصيبة إن التفكير فى الأوبشن التانى بيخلى الواحد جسمه يقشعر بصراحة. و بعدين إحنا شعب غوغائى همجى و معندوش ضمير، لما نبقى نتحسن نبقى نطالب الحكومة إنها تتحسن.
و بعدين أصلا التيار الإخوانى متغلغل زى السرطان فى الناس و أهيه عينة، بقينا أحسن؟ الشغل بيتعمل؟ دة يا مواطن منين ما تروح أى مصلحة حكومية تسأل على الموظف اللى انت عايزه يقولوا لك الحاج فلان بيصلى، طيب و مصالحى أعملها إمتى؟

إحنا فى مصر مش محتاجين دين و لا تدين، إحنا محتاجين أخلاق و ضمير و قيم. من الآخر إحنا شعب عايز تربية.

Tuesday, October 16, 2007

شر البلية

موضوع كوميدى أوى ماتخيلتش إنى أقراه فى يوم من الأيام.
الموضوع يا سادة يا كرام على مدونة بنت إخوانية و بيدور حول قضية رئيسية فعلا هى:
البنت الإخوانية لازم تتجوز "أخ" على حد تعبير المدونة و لا ممكن تتجوز واحد متدين من المهرطقين العاديين مش من الإخوان؟
يا حلاوة يا ولاد، البلد إتقسمت مسلمين و مسيحيين، و بعدين المسيحيين إتقسموا أرثوذكس و كاثوليك و بروستانت و المسلمين إتقسموا سنة و شيعة و السنة إتقسموا إخوان و مش إخوان، و بعد كدة هيتقسموا إخوان بمبة مسخسخ و إخوان فحلقى.
لاء و بتقول لك أيه الأخت الإخوانية، بتقول إن لو الواحدة الإخوانية إتجوزت واحد مش إخوانى مش هيمسكوها مناصب كان ممكن تمسكها ، ليه يا حلوين و جتكوا وكسة هى أيه المناصب اللى هتمسكها أصلا و هى حرمة لا طلعت و لا نزلت؟بيقولك آل عشان أسرار الدولة الإخوانية ماتطلعش برة للكافر جوزها اللى هو متدين بس و بعدين حكت موقف ضحكنى موت الصراحة، واحدة إخوانية متجوزة واحد مش إخوانى إتخانق معاها خد نوتة تليفوناتها و قام مبلغ على كل "إخواتها" اللى فى الحى :))))))
و بعدين صاحبة المدونة بتسأل سؤال حيوى عميق: البنت الإخوانية تستنى تتجوز واحد أخوانى و هو قد ما يعرضها و العياذ بالله لبلاء العنوسة المنتشر فى المحروسة و لا تقضيها و تتجوز واحد متدين و خلاص؟
إنتوا أيه رأيكو؟أنا رأيى: كلمة مش مؤدبة

Friday, October 12, 2007

تهنئة بالعيد


قبل ما تقرا العنوان و تقفل الصفحة على أساس إن دى تهنئة بالعيد زيها زى باقى التهانى اللى مالية البلوجات اليومين دول زى ما كنت هعمل بالظبط، إنزل بالسكرول شوية و إقرا سطرين و مش هتسيب البوست غير لما تخلصه لأن دة كلام طالع من القلب فعلا و دة اللى خلانى أنقل لكم اللينك و جزء من البوست عن مدونة العدالة للجميع
كل عام وأنتم بخير
كل عام والناس أقل زيفا
والتدين أقل قشرية
والناس أكثر رحمة وأقل ظلما
والدعاة أقل ضجيجا وأكثر عملا
والمتدينون أكثر " خلافة " وأقل " دعوة ودعاية " وأفضل سريرة
والوطن أكثر أمنا وسلاما
والفقر أقل وطئة
والمظلوم أعلي صوتا وأجرأ مبادرة
والظالم أخزي وأدني مكانة
كل عام ونحن نعرف انفسنا علي حقيقتها
ونقل من أفيون الدين ما استطعنا
ونكثر من روح الدين ما تمكنا
كل عام ومسلمو ومسيحيو هذاالوطن أكثر انسانية
إضغط على اللينك دة لقراءة البوست كامل و كل سنة و مصر كلها طيبة، طيبة مش كويسة، لاء طيبة حنينة و قلبنا على بعض: