بلوجاية بكتبها تنفيث انفعالات مش اكتر
و ممكن امسحها كمان ساعة، كمان يومين، كمان شهر
الأكيد إنها هتتمسح
بعد مرور سنة إلا كام يوم من آخر مرة
و بعد مقاومة عنيفة
كلمته امبارح
اول مرة رد عليا هو
أنا إتكهربت لما سمعت الصوت فقفلت
تانى و تالت مرة لأن كان فيه تانى و تالت مرة ردت عليا واحدة ست
كدبت ودنى و قلت يمكن أخته
كلمته الصبح رد عليا
مين معايا؟
يعنى ناسى النمرة و الصوت كمان؟!
فلانة
فلانة مين؟
فلانة الفلانى
اااااااه ازيك حضرتك
حضرتك؟
طلباتك حضرتك
ابدا كنت بسأل عليك
انا الحمد لله كويس و انتى
الحمد لله
على فكرة انا خطبت فى شهر تلاتة و هتجوز بعد عيد الميلاد، بنت عندنا فى الكنيسة
مبسوط؟
اه الحمدلله
على فكرة يا ريت..
ماتقلقش مش هكلمك تانى انا بس كنت بسأل فلانة عليك-صديقة مشتركة- و قالت انك ماكلمتهاش من فترة طويلة قلت اطمن
فيكى الخير
لغاية دلوقتى -هو مش لغاية دلوقتى اوى انا قافلة معاه من ربع ساعة- ايدى بتتهز من الإنفعال
و سؤال سرمدى عميق يطرح نفسه- انا بفكر اسمى المدونة دى سؤال سرمدى عميق-
هو دة الحنين الطيب اللى كان معايا؟ و لا كان بيدعى و دة فيس كان لابسه و بعدين لقى إن مفيش داعى له حاليا؟
و لا دة رد فعل على الطريقة اللى سبته بيها من سنة؟
سؤال سرمدى عميق تانى
هو انا ليه رغم انى منفعلة و حاسة بإهانة -من طريقة الكلام مش عشان خطب ما هو كان كدة كدة هيخطب- كنت بقول رغم انى منفعلة و حاسة بإهانة مستريحة؟ يمكن عشان كدة انا هبطل افكر فيه خالص و هستريح من تفكير و مقارنات بينه و بين غيره دامت سنة؟ و بينى و بينك الموضوع ماكنش نافع اصلا
و كان فيه اختلافات كتير هتظهر ان عاجلا ام آجلا - مين آجلا دة
اختلافات محافظة و وسط و نشأة و تربية
يلا كل الأشياء تعمل معا للخير
بس زمانه هيروح مبسوط يقول لأهله و معارفه و معارفه اللى يعرفوا معارفى و معارف معارفه اللى يعرفوا معارفى و مش بعيد الاقى الخبر جه من الفيوم لإسكندرية دليفرى
يا شماتة أبلة ظاظا فيا
أيه اللى انا بقوله دة؟ بهزر كمان؟ دة انا معنديش دم فعلا
بس القافية حكمت طيب أعمل ايه
انا حزينة فعلا بس الجملة وقفت فى زورى مقدرتش
هقوم اشوف اكل فى التلاجة انفث فيه عن حزنى النبيل
8 comments:
السلام عليكم
وانت تعكنني على روحك ليه؟
يمكن وحدة بدماغك دي خسارة فيه وربنا هبيعتلك الي يفرح عينك وقلبك وتبقي تفتكري الحجات دي وتدحكي
الا بالحق لقيت ايه في التلاجة
ملوخية بالارانب ولا طاجن بمية باللحمة الضان؟
:)
و الله يا نانى ياختى فى مواضيع الحب دة الواحد مش بيفكر مين احسن و لا مين خسارة فى مين
هى كيميا زى ما بيقولوا
و الإنفصال كان بسبب حوار تحكيم العقل دة
و بعدين انا مش زعلانة عشان خطب، انا استغربت اوى من طريقة الكلام
يابنتى دى شخصية انا كنت بتحايل عليها تاخد موقف ساعات
دة انا كنت بقوله مفيش مشكلة لو اختلفنا مرة و زعلتنى مش كل مرة انا اللى ازعلك
و اللى زعلنى اكتر انى مالقتش حاجة فى التلاجة
اعمل ايه فى نفسى دلوقتى؟
خطوة عزيزة يا شابة
يا كوفي يا شيخة ولا يهمك... بكره يجيلك سيد سيده ويقول لك شبيكي لبيكي... بس إنتي ما تحرميناش من خفة دمك وتعليقاتك السرمدية العميقة إللي زي العسل اللي بالطحينه... حا تلاقيه ورا حلة الزر علي يمينك في التلاجة
السلام عليكم
اهو يا ستي لو ملقيتيش حاجة في التلاجة اعملي قهوة تعدل دماغك الحلوة دي
والكيميا دي احيانا تودينا البحر وترجعنا عطشانين
طب تعملي ايه لو اكتشفتي ان الي بتخططي انت واياه من 4 سنين تتجوزو واهلك رافضين تبصي تلاقيه بتكلم مع البت الي حبها قبلك على الفيس بوك
لا وايه بيشخط فيك ويقلك انت بتغيري ليه؟
انا كنت بشقر عليها مش اكتر
والحمار مش فاهم اني والله مش غيرانه منها ابدا بس كنت احب لو قلي مفيهاش حاجة يعني
خلي الطابق مستور ده انا هفرقع
:)
انا تقريبا لسه مكتشفة مدونتك من يومين
والنهاردة لما قريت البوست ..حسيته..ويمكن افتكرته
اقولك ..انا عارفة انتي حاسة بايه
بس روح السخرية خلتني لاول مرة ..اشعر ان الموضوع كان بجد يضحك
سيبك انت منه وانا هجوزك سيد سيده
واجوز طنط ظاظا كمان عشان ما تشمتش
تحياتي
حسن الهلالى
أنا برضه بقول ان بكرة يجى لى سيد سيده، فكرك المواضيع دى تفرق معايا؟ إتلاكاً
nani
"لا وايه بيشخط فيك ويقلك انت بتغيري ليه؟"
على فكرة هو بيقول لك كدة مش عشان زعلان انك غيرانة بالعكس، هما اصلا بينبسطوا جدا بالإحساس دة زى ما تقولى بيديهم ثقة فى نفسهم و كل ما يلاقيكى غيرانة كل ما بيسوء فيها
عارفة يتلم امتى؟ لما تكبرى دماغك ع الآخر
هتلاقيه بيتشال و يتهبد و مش بعيد يقول لك انتى باردة مش بتغيرى عليا ليه
هدى
"اقولك ..انا عارفة انتي حاسة بايه"
شكلك أبلة ظاظا شمتت فيكى قبل كدة قولى قولى ماتتكسفيش
انا بفكر اعمل نادى يجمع امثالنا
:)
خطوة عزيزة يا شابة
3ayza el 7a2? you shouldnt call him. Your call after one year is a sort of Shamata. You just discovered suddenly that your Shamata returned back to you. I feel that he was still in your mind because when the woman truly leaves she NEVER come back
he& she
عشان ماتقولش انى مابحبش اتفاعل مع الأودينس بتوعى-عشت و بأة لى اودينس :)
بص يا فندم الموضوع مش شماتة و لا حاجة، انا هشمت فيه ليه؟ انا مش سايباه عشان خناقة و الكلام دة
احنا كنا كوول اوى وقت ما سبته و الموضوع تم بهدوء و من غير اهانات او كلام جارح متبادل و السبب كان تحكيم العقل
وقت ما كلمته كنت لسة بفكر فيه؟ آه بس مش عشان عايزة ارجع. لكن عارف لما يمر وقت من غير ما تكلم حد عزيز عليك و فجأة توندر أى تتساءل
يا ترى الإنسان دة فين دلوقتى و بيعمل ايه؟
انا اللى تعجبت له هو ليه بيكلمنى كدة رغم انى لما قررت انى كفاية كنت بكلمه كأنى بحسس عليه
Post a Comment