و أنا بتفسح بين المدونات شفت لك التدوينة دى و عجبتنى موت و بعد ما كتبت كومنت لقيت إن الكلام ينفع بوست مستقل، إقرا البوست اللى انا قريته و بعدين كمل على تحت
لاء احنا مش مقبلين على مرحلة سيطرة الإخوان
احنا بالفعل فى مرحلة سيطرة الأخوان و الإخوان جايين جايين
و الناس حاليا مقسومين نصين
نص عبيط بيحب الإخوان عشان نظام قال الله قال الرسول و فاكرين ان الدنيا هتبقى بمبى لو الإخوان مسكوا الحكم مش عارفين انها هتبقى بمبى مسود
و النص التانى و هو النص الأعبط من النص الأولانى و بيؤيد الإخوان نكاية فى الحكومة و من باب حرية التعبير و الديموقراطية و نجرب إلخ
النص التانى دة أوضح مثال له الدستور فى إصدارها التانى، بدأت السنة اللى فاتت أيام إنتخابات مجلس الشعب بتأييد الإخوان على خفيف و شوية و بأت بالمفتشر كدة
مش عارفين إن الشتيمة اللى مبارك كان سايبهم يشتموها فيه و فى إبنه مش هيعرفوا يقولوا نصها و لا حتى بم فى وش الإخوان لو مسكوا الحكم من باب إحترام أولى الأمر منكم و بدل ما الحكم على واحد زى ابراهيم عيسى غرامات و حبس هيظبطوه بكام جلدة عشان يفرح بالديموقراطية لأن ببساطة الديموقراطية ماتنفعش مع العالم دى.. الديموقراطية بالنسبة لهم ون واى أى إنهم يمارسوا حريتهم هما بس و الحرية بالنسبة لهم حريتهم هما بس يعنى أحرار يلبسوا الحجاب لكن احنا مش أحرار اننا نقلعه.
وجهة نظرى الخاصة و اللى ممكن كتير يعارضنى فيها إن الحكومة الحالية حرامية أينعم لكن على الأقل فيه بقايا حرية، و أنا أتذمر على اللى موجود لو الأوبشن التانى أحسن لكن المصيبة إن التفكير فى الأوبشن التانى بيخلى الواحد جسمه يقشعر بصراحة. و بعدين إحنا شعب غوغائى همجى و معندوش ضمير، لما نبقى نتحسن نبقى نطالب الحكومة إنها تتحسن.
و بعدين أصلا التيار الإخوانى متغلغل زى السرطان فى الناس و أهيه عينة، بقينا أحسن؟ الشغل بيتعمل؟ دة يا مواطن منين ما تروح أى مصلحة حكومية تسأل على الموظف اللى انت عايزه يقولوا لك الحاج فلان بيصلى، طيب و مصالحى أعملها إمتى؟
إحنا فى مصر مش محتاجين دين و لا تدين، إحنا محتاجين أخلاق و ضمير و قيم. من الآخر إحنا شعب عايز تربية.
9 comments:
الله ينور عليكي
المشكلة اننا لا نتعلم من تجارب الاخرين
انا اردني ولدي الكثير من الاصدقاء الفلسطينيين والمصريين من خلال بقائي في الاسكندرية لمدة عام واكمالي دراستي في الاردن لاحقا ، وكثير من هذه العلاقات استمرت حتى الان رغم مرور فترة طويلة على انتهاء الدراسة
المهم
من خلال متابعة ما كان يجري في الاراضي الفلسطينية وما نسمعه من الاصدقاء الفلسطينيين عن فساد السلطة الحاكمة هناك شعرنا ببعض الفرح عندما فازت حركة حماس بالانتخابات وقلنا لنفسنا احسن خليهم يتربوا
استلمت حركة حماس الحكومة ويا للمفاجأة
في يوم 15/5/2007 وهو ذكرى النكبة وقيام دولة اسرائيل ، والاسرائيليين في عز احتفالاتهم ، كان الاخوان في حركة حماس يقومون بواجبهم المقدس في قتل ابناء الشعب الفلسطيني وجرجرتهم في الشوارع
انا بصراحة وانا بسمع في الاخبار ، كنت حاسس اني يمكن تيجيني جلطة وكنت عاوز افش خلقي في اي حاجة ، ولا شعوريا لاقيت نفسي برفع سماعة التلفون واتصلت باحد الاصدقاء الفلسطينيين في الضفة الغربية ( وهو بالمناسبة ليس من حماس وليس من حركة فتح ) وفي عز انفعالي لقيتني بقول لصاحبي والله انتو بهايم ، طيب اعضاء السلطة السابقة اولاد كلب وفاسدين ويوجد الكثير منهم عملاء لاسرائيل طيب الاخوان في حماس ميعرفوش ان في حديث نبوي بيقول ان لو اثنين مسلمين تقاتلوا وواحد قتل الثاني يبقى الاثنين في النار ؟؟؟؟
خدي بالك من الجواب
صاحبي ضحك ضحكة طويلة وقال لي : هو انت ما عرفتش ، الاخوان اصدروا فتوى ان هذا الحديث ينطبق على اثنين مسلمين ، واعضاء حركة فتح كفرة ولا ينطبق عليهم ذلك وبالتالي من الجائز قتلهم .
بس خلاص
شوفي يا ستي
لو الاخوان وصلوا للحكم في مصر رح تبقى مصيبة للمصريين بس رح تكون مصيبتين لباقي الدول العربية لانه عادة اي تغيير جوهري في مصر سيتسرب لاحقا الى بقية الدول العربية ، وزي ما انتي عارفة باقي الدول العربية مش ناقصها ، اصلا التخلف اكوام اكوام
ارجوا الا يفهم مما قلته سابقا انني مع السلطات الحاكمة في الدول العربية لانها فعلا سلطات فاسدة ولا تصلح لقيادة الشعوب العربية ، ولكن ان كان بديلها هو الاخوان ومن هم على شاكلتهم سنكون كمن استجار من الرمضاء بالنار .
الله يستر
والله صدقتى
أحنا محتاجين أعادة تأهيل
كل خطايا الشعوب عندنا أحنا شطاره
الرشوه شطاره
والسرقه شطاره
بصى أحنا نقضيها تعليقات عند بعض
هههههههه
أشطه ياباشا
الحلوه دى من الأنفوشى
فعلاً معاكى حق بلا نيله
رمال صحراء العرب تغرق مصر مع فلوس الجاز
وإحنا شعب صايع وطالما المصلحه فى إتجاه معين كله بيروح يحاول يكون أول واحد فى الإتجاه ده
وبعدين رغم إنى من المعارضين للعصابه الحاكمه لكن ليا راى ما مثلاً فى الإنتخابات زى الرئاسه لو إتعملت نزيهه هيرشحوا حسنى لأن الموظف المرتشى والحراميه والنصابين و و و و من مصلحتهم إنه يفضل ياكلوا عيش إزاى
مساء الحريه
طيب انتي معاكي حق في كلامك لكن اعذريني يا عزيزتي ممكن اختلف في نقطه مهمه انتي قولتيها
"إحنا فى مصر مش محتاجين دين و لا تدين، إحنا محتاجين أخلاق و ضمير و قيم. من الآخر إحنا شعب عايز تربية"
ايوه محتاجين قيم واخلاق لكن برده محتاجين دين وتدين لأن الدين مش هو الغلط لكن التطبيق هو اللي غلط ومتقنعينيش اني لما الغي التدين والدين واعتمد على الأخلاق الحميده اللي هي اصلا المفروض نستمدها من الدين السليم -هيكون حالي احسن والدليل بصي على الدول الأجنبيه لما اعتمدوا على الأخلاق تفتكري الكل التزم بالأخلاق بالعكس انتشر الفساد والرزيله انا مش هاعمل عليكي شيخ واقولك اللي ان الحجاب مش نوع من الحريه الشخصيه وانه فرض مفيهوش جدال كل واحد هيتحاسب عن نفسه ومفيش حد عبيط او ميعرفش الصح من الغلط لكن احنا بنحب نضحك على نفسنا شويه
المهم يعني انا برده شايف ان الأخوان مش هم اللي هيقيموا الدين الصحيح لأن هدفهم ملوث بالبحث عن السلطه ولو بصيتي على مرشحينهم في المجلس مثلا مفيش اي انجاز بيعملوه ساعة الترشيح يعتمدوا على اهتمام الناس بالدين ويقولوا لازم نساند المرشح اللي تبع الدين وبعد كده كل سنه وانتي طيبه مبيجيش تاني الا على الموسم الجديد
وختاما طولت عليكي واتفزلكت شويه
لكن الأختلاف في الرأي لا يفسد للفول طعميه
سلاااااااااااااااااام
Yaaaaaah. Enti gebti el mofeed. Howwa keda el kalam. Sha3b 3ayez tarbia. If fact we are sha3b 3ayez ka2ed mostaneer wa 7azem wa haza gher motawaffer 7alian
yousef
"الاخوان اصدروا فتوى ان هذا الحديث ينطبق على اثنين مسلمين ، واعضاء حركة فتح كفرة ولا ينطبق عليهم ذلك وبالتالي من الجائز قتلهم . "
طيب و مين إداهم الحق يحكموا على أعضاء حركة فتح إنهم كفرة و لا لاء؟ مشكلة التيارات الدينية إنها بتستحل لنفسها حقوق مش ملكها أساساو على أساس الحقوق دى تظبط فتاوى و تقيفها على المقاس
الأميره أوسه
"
كل خطايا الشعوب عندنا أحنا شطاره
الرشوه شطاره
والسرقه شطاره"
ما هو إحنا الشعب اللى دهن الهوا دوكو يا أوسة، و بعدين إحنا عندنا براعة فى تبرير بلاوينا
hshady
"رمال صحراء العرب تغرق مصر مع فلوس الجاز"
و دة اللى عامل الطينة اللى احنا فيها
"وبعدين رغم إنى من المعارضين للعصابه الحاكمه لكن ليا راى ما مثلاً فى الإنتخابات زى الرئاسه لو إتعملت نزيهه هيرشحوا حسنى لأن الموظف المرتشى والحراميه والنصابين و و و و من مصلحتهم إنه يفضل ياكلوا عيش إزاى"
أنا عن نفسى لا حرامية و لا مرتشية على حد علمى بس لو اتعملت انتخابات نزيهة بين حسنى و الإخوان هرشح حسنى من هنا لبعد بكرة، ما هو مش هنطلع من حفرة نقع فى فتحة مجارى
الشنكوتي الكبير
"اعذريني يا عزيزتي ممكن اختلف في نقطه مهمه انتي قولتيها"
إختلف زى ما إنت عايز يا شنكوتى، هو انا فى ديك الساعة لما نختلف :)))
"
ايوه محتاجين قيم واخلاق لكن برده محتاجين دين وتدين لأن الدين مش هو الغلط لكن التطبيق هو اللي غلط "
بص أنا ماليش دعوة التطبيق غلط و لا صح، دى حاجة بين كل واحد و ربنا. أنا مش بقول إن الدين هو الغلط، لكن أيه الفرق بين الدين و الأخلاق؟ الدين إنك تصلى تصوم تدى المحتاجين إلخ.. لو ماصلتش و ماصمتش إنت حر، دى حاجة مش هتضرنى أنا، هتضرك إنت. و فى نفس الوقت لو صليت و صمت إنت حر لأن مش أنا اللى مستفيدة، إنت اللى مستفيد. فتدين أو لا تدين ببساطة أنا لا أهتم لأنها علاقتك الشخصية بربنا.
الأخلاق بأة ، إنى أرد عليك بأدب، إنى لو بأدى لك خدمة مقابل فلوس أى ما إصطلح البشر على تسميته بالعمل، إنى أؤدى العمل دة على أكمل وجه.
لو أنا ماعنديش أخلاق يا شنكوتى ماتقدرش تقول إنى حرة لأن لا أخلاقيتى دى هتضرك .
و بعدين إنت بتقول بصى على الدول الأجنبية لما الكل إعتمد على الأخلاق و سابوا الدين إنتشر الفساد و الرذيلة.
أيه الرذيلة اللى إنتشرت؟ زنا؟ يدخل تحت نطاق الحرية الشخصية و علاقة الإنسان بربنا و اللى بيشيل قربة مخرومة بتخر على دماغه. هل لو إنت عايش فى مجتمع فيه الناس عايشة و مظبطة التظابيط دة هيضرك إنت فى حاجة؟ لاء كل واحد يخليه فى نفسه.
لكن لو عايش فى مجتمع بيدعى العفة و الطهارة بس ما بيصدق يلاقى بنات عشان يتحرش بيهم و يضايقهم و يقول لك هما اللى جابوه لنفسهم و يبقى المتحرش هو المظلوم و البنات المتحرش بيها هى اللى جابته لنفسها دة أكيد هيضرنى و يأذينى لأنى مش هبقى آمنة.
و بعدين هما إعتمدوا على الأخلاق و إحنا اعتمدنا على الدين، هما فين و إحنا فين؟
مرة تانية انا مش بقول نسيب الدين، لكن الدين حاجة بينك و بين ربنا و انا ماليش دعوة بيها، صوم ماتصومش، صلى ماتصليش دى حريتك الشخصية
لكن ماتقوليش انا هصوم و أصلى بس لما يبقى ليكى شغل عندى مش هعملهولك عشان اللهم إنى صائم و لا عشان رايح أصلى
"واقولك اللي ان الحجاب مش نوع من الحريه الشخصيه وانه فرض مفيهوش جدال كل واحد هيتحاسب عن نفسه"
فرض و لا حرية شخصية مش قضيتنا، اللى عايز يتحجب يتحجب و اللى عايز يتنقب يتنقب لكن ماحدش يمشى يبص لى على إنى عجبة ماشية فى الشارع عشان مش محجبة و الىى يقول إستغفر الله العظيم و اللى يتنفخ و اللى يقل أدبه و يرجعوا يقولوا هى اللى اجبته لنفسها
" الأخوان مش هم اللي هيقيموا الدين الصحيح لأن هدفهم ملوث بالبحث عن السلطه ولو بصيتي على مرشحينهم في المجلس مثلا مفيش اي انجاز بيعملوه ساعة الترشيح يعتمدوا على اهتمام الناس بالدين ويقولوا لازم نساند المرشح اللي تبع الدين وبعد كده كل سنه وانتي طيبه مبيجيش تاني الا على الموسم الجديد"
الإخوان أصلا بيسوقوا الهبل على الشيطنة فى المجلس، و كل دماغهم فى الكلام الفارغ
إمنعوا مش عارفة مين من الغنا فى مصر، إمنعوا مين من الظهور على التلفزيون المصرى
و كله هبل فى عبط
منور يا شنكوتى لا أسكت الله لك صوتا يا عم
He & She
صح و لا أعتقد إنه هيتوفر أصلا
ساعات بحس إن لا أمل فى إصلاح البلد دى فعلا
إخوان ايه اللى جايين جايين دول ؟
ايه الكلام اللى مش واقعى ده
اوعى تقولى او تتكلمى زى كده تانى او يكون ده رأيك فى البلد
الأخوان لو عملتى مقارنة بينهم وبين الحزب الوطنى مثلا هتلاقى فى اكتساح للحزب الوطنى والشعب اصلا مالوش اى مشاركة سياسية يعنى لو الأخوان زى مانتى بتقولى متغلغلين فهما متغلغلين على نفسهم
لكن مستحيل الجيش او الشرطة يسمحلهم بانهم يمسكوا الحكم
وبلاش بقى سيرة الاخوان دى تانى بقى فى البلوج بتاعك
اهم عمالين يتلموا شوية شوية فى المعتقلات وربنا يحرقهم كلهم
Post a Comment