Friday, August 08, 2008

من غير عنوان

قدامى مج نسكافيه و فاتحة سايت عليه اغانى لفيروز بحاول اسمع اغانى جديدة عشان اللى يعجبنى انزله، و من الشباك اللى ورايا جاى صوت الشيخ من الجامع اللى جنبنا بيتكلم فى قضية خطيرة: ازاى المسلمين مش بيردوا بتحية اسلام الكاملة مع ان المفروض يردوا التحية بأحسن منها؟ ليه و ليه لما اخوك المسلم يقول لك السلام عليكم، ترد و تقوله و عليكم رغم انك مفروض تقول السلام عليكم و رحمة الله و بركاته؟ موضوع شائك فعلا و هو دة سبب كل مصايبنا على جميع المستويات.

يتكلم فى اللى يحبه هو حر بس مشكلتى ان صوته جاى من برة اعلى من صوت سماعة الكمبيوتر اللى تبعد عنى اقل من نص متر.

الحمد لله بيختم..

اللهم ارحم موتى المسلمين.. اللهم اشفى مرضى المسلمين..

بحسها جملة شوفينية شوية، هو خايف يقول اللهم ارحم الموتى فربنا يغلط و يرحم كل الميتين شروة واحدة؟

عموما يا رب..

لو سمحت ارحم كل الناس الميتين و العايشين..

و أشفى كل الناس..

و إبهج كل الناس..

و بارك فى مياه النهر و المطر و الزرع..

3 comments:

Rain_Drops said...

خطبة ساذجة زي اللي سمعتيها دي مش هتتسبب في مصايب كتير أكتر من تضييع وقت الناس الفاضية اللي بتسمعها ، فيه خطب بتبقى فعلا قاتلة و بتتسبب في جرائم انتحار

شوفي هنا صديقنا شدو و الخطب اللي بتحاول تقتله
http://mshedou.blogspot.com/2008/05/1.html
http://mshedou.blogspot.com/2008/06/blog-post_03.html

He and She said...

Sa3at sa3at your post amuses me ( beykayyefni). You remind me of my sufferings when I was living back there in Alexandria all my life. My home was few steps from Chatby Mosque. I will leave it to you to imagine the rest
Safwat- California

أحمد أبو القاسم said...

رجعت تاني زي ما وعدت في أول مرة زرت المدونة الجدلية

لو دي كانت خطبة جمعة فعادي ان الميكروفون يكون شغال لمدة ساعة في الاسبوع
لكن في الاوقات العادية من حق الناس ترتاح والصلاة كمان تكون بالميكرفونات الداخلية مش الخارجية
الاذان بس هو اللى يكون بمكبرات الصوت

الخلاصة أن هناك حقوق لغير المسلمين علينا وللمسلمين المسنين والمرضى أيضاً
كمان أن الحكمة والموعظة الحسنة لم تكن أبدا بالاجبار
فهناك العديد ممن ولدوا مسلمين لا يستمعون الى تلك الخطب بل ان بعضهم لا يصلى من الاساس
والمسلم لا يملك الا النصيحة للمسلم ولغير المسلم على حد سواء
فكل انسان الزمناه طائرة في عنقة
وكل منا سواء مسلم او مسيحي او حتى ملحد
سيحاسب امام الله عن عمله
وعن عمره
وعن ايمانه
وعن ايذاء جاره كمان

فالاسلام الحقيقي دين سماحة ووعظ وارشاد
دين يعمل على التيسير على المسلمين وغير المسلمين على حد سواء
ودين يعترف ويؤمن ويحترم كل ما قبلة من ديانات

واعتقد ان كتير جدا مقتنع بان الموضوع محتاج لوقفة تصحيح للمفاهيم مع المسئولين عن المساجد