عارف الكوريكتور؟
القلم اللى بينزل بتاع أبيض دة اللى كنا لما بنغلط فى الكتابة بالقلم الجاف بنمسح بيه الغلطة و نكتب فوقها؟
أنا نفسى يخترعوا كوريكتور للذكريات
عارف أيه أول حاجة همسحها؟
إسمك
عارف؟ انا شطبت عليه كذا مرة
بقالى سنة و نص بشطب عليه
حد يقعد يشطب سنة و نص؟
انا بشطب بقالى سنة و نص بس برضه لسة باين
و كل ما اشطب اكتر بيبان اكتر
و بيفكرنى اكتر
تفتكر الكوريكتور ممكن يبينك اقل؟
للإسف معنديش اوبشن انى اقطع الصفحة كلها و اكرمشها و ارميها و اكتب فى واحدة جديدة
كل واحد بياخد ورقة واحدة بس يكتب فيها اللى يحبه
يشطب، يكتب، بس مفيش خيار بدأ صفحة جديدة
بس لغاية ما يعملوا كوريكتور الذكريات هفضل أشطب لعل و عسى..
9 comments:
Share wz me some of the corrector ya Coffee when u find it plzzz :)
طيب ما تقطعي الورقة كلها
والا فيها حاجات تانية مهمة
انا من رأئي تحرقي الورقة كلها
تحياتي
حبيبتي
طول ما انتي بتشطبي بحبر عليه حيفضل الاسم موجود
متخبطيش عليه
حتلاقي الحبر بدى يبوش و يروح و يبهت
و بكده حتنسيه و تلاقي اللي احسن منه
و امسحي الرقم من التلفون
لو مكتوب لك حتلاقي الف طريقة ترجعك ليه
و لو مش مكتوب لك ولا الجن الازرق يوصلك له تاني
ريحي دماغك يا كوفي
تحياتي
كوركتور الذكريات هو التجاهل...يعني تتجاهلي الاسم و الشخص و كل ما يذكرك
به....في هذه الحالة سيقوم العقل بتخزين هذه الذكري في اللا شعور...بدلا
من بؤرة الشعور...
لان كل مرة حضرتك تشطبي علي اسمه تعيده
الي بؤرة الشعور دون ان تدري...
تحياتي و تقديري..
ياه لو عندنا كوريكتور نمسح بيه الحاجات اللي بتجرح فينا والناس اللي مش بنحبهم كنت الدنيا بقت جنة
اسلوبك فى الكتابة ممتاز....تحياتى
هو الاسم لازق للدرجة دى
معلشى لما تقابلى اسم تانى يقدر يحافظ عليك هتلاقيه انشطب لوحده وبكل سهولة
ربنا يوفقك
لو فضلنا نمسح في كل حاجة زعلتنا كدة مش هنلاقي حاجة نتعلم منها طول ماحنا ماشيين
لاننا لما هنمسحها اكنها محصلتش
يعني هتتكرر تاني مع حد تاني
او نفس الحد لاننا مش هنبقي عارفينو بقة
طيب اية فايدة الكوريكتور
انا من رأيي تحطي تحتو شرطتين و تعملي سهم و تقولي دي حاجة كدة ف يالارشيف و بكرة هتنسي و تبقي حلوة بس هيفضل الدرس موجود
مش حلو الكوريكتور ومش حلوة الشخبطة لانها بتبوظ شكل الورقة
اعملي خط و قولي لاغي
متخليش واحد انتي عايزة تنسية يبوظلك تنظيم الورقة ( او حياتك) خليكي انتي اقوي
وبعدين اتعلمي اكتبي بالرصاص وخلي معاكي استيكتك لو عايزة تمسحي بقة ههههههه
مع اني معترضة علي دية كمان
اني وايز
اسلوبك حلو ماشاء الله
سلاموزة
قدرة المونتير علي قص شريط الفيلم
لم و لن توفر لنا ابدا
فالذكريات هي باختصار
ما نحن عليه
----------
هما مين دول اللي خدوا الفرنسيسكان ؟
Post a Comment