Monday, June 23, 2008

شوفوا خنساوات فلسطين يا غجر


ليلة زى كل ليلة، ببتديها من 12 بعد منتصف الليل بتصفح الجوجل ريدر و أنهيها بفيلم أجنبى..

و رغم انى الحقيقة من مدمنى قراءة المدونات إلا إنى بحس بحاجز نفسى بينى و بين انى اقوم بالتدوين.. ليه مش عارفة

يمكن لأنى من كتر ما اتعودت اكتم افكارى مابقتش ارتاح لفضحها حتى على صفحة انترنت ممكن امسحها بتكة زرار، و لا لأنى أصبت بداء التنفيض و تكبير الدماغ لدرجة انى مابقتش متحمسة لمعارضة الأفكار المستفزة المتخلفة و لو على النت.. مجرد انى بقرا ناس زى حسن الهلالى و فانتازيا و زبيدة و اقول و الله برافو.. دة لسة فيه ناس بتفهم فى البلد المعفنة دى! و بقرا ناس تانية بلاقيها على الريدر و أحس انى هرجع من ريحتهم المقرفة. ما اكيد ريحتهم مقرفة لأن العطور رجس من عمل الشيطان و ببقى موشكة انى اشوف المدون من دول و دقنه بترعى فيها الحشرات الطائرة و بتتمشى و واخدة راحتها.

يسألنى سائل طب اشمعنى النهاردة بتورينا طلعتك البهية، إستنى كدة انزل تحت، الله! دة انتى من مارس ماكتبتيش حاجة! الله! دة انتى حتى مش بتردى على التعليقات.

اقول للسائل، الحقيقة يا سائل يا خويا، هى فعلا كانت زى كل ليلة بتصفح الريدر و مصممة ان مفيش حاجة هتستفزنى انى اكتب

و نازلة بالسكرول داون داون داون عشان اعدى على كل الهراء و التخلف عشان اتفادى الإنفحاش اللى بيجيلى فى المرىء من قراءة كلمة واحدة منه، الاقى بوست ظريف اوى لحسن الهلالى، واحدة لابسة فستان مينى جيب و واحد بيقيس المسافة بين آخر الفستان و الركبة عشان يتأكد ان المسافة ماتزيدش عن 15 سم حسبما نص القانون

البوست اهو

http://hegab-nekab.blogspot.com/2008/06/blog-post_22.html

ضحكت شوية و كملت نزول، طبعا اى سياسة وآراء حنجوريه ارمى فى الباسكت

اى تخلف ارمى فى الباسكت

أذ بى افوجىء بتدوينة لواحدة اسمها فيه كلمة حرية و مش هحط اللينك و لا هقول اسم المدونة لأنى بصراحة مش عايزاها تنط لى هنا هى و الشلة بتاعتها لأنى ببساطة هنفض لهم عشان بطلت مناقشة مع الشخصيات دى من زمان شوية.

اللى لفت نظرى ان مجموعة الإخوان على البلوجر بيعشقوا اوى كلمة حرية و دى حاجة مش لاقيالها تفسير.

بتقول ايه بأة اختى المدونة البريونية

اولا من فوق حاطة فيديو من يوتيوب فيه شوية ستات شبه امو زبعبع اللى ماما كانت بتخوفنى بيها و انا صغيرة، و حاطة العنوان ما معناه "اتكسفوا على دمكوا يا غجر، شوفوا خنساوات فلسطين". انا قلت ايه خنساوات دى، و جه فى دماغى الحجرى ان خنساوات دى حاجة زى الخنفسة حيث ان الستات سود شبه الخنافس و مش باين لهم راس من كوع من ركبة و قاعدين فى دايرة و ماسكين بنادق و بعدين خدت بالى ان دة جمع خنساء و ان هى يعنى بتدعونا للتشبه بالستات الأمامير خالث خالث دول. شغلت الفيديون، هوب لقيت الخنساوات واقفين فى الصحرا و ماسكين البنادق و بيتدربوا على اطلاق النار. حاجة تفرح الحقيقة. بس اللى قلقنى ان الخنساوات منقبين و مغميين عنيهم و كدة ممكن السلاح يطول و الخنساء تضرب النار غلط على اختها الخنساء و البلد تولع. المهم ماجليش طقطان اكمل الفيديو الحقيقة .

بس عموما احب اطمنك اختى المدونة البريونية احنا كمان بأة عندنا خنساوات و ماحدش احسن من حد. آه! بس احنا الخنساوات بتوعنا اسلحتهم لا بنادق و لا هجص من دة. احنا الخنساوات بتوعنا اسلحتهم كيماوية بيولوجية من غير دم. بالك انتى اركبى الأتوبيس و لا الميكروباص جنب خنساء و ياااااااااه يااااااااااه يااااااااااااه. بلاش عدى فى الشارع بس تعدية جنب خنساء من الخوانس هتشوفى اللى عمرك ما شفتيه و تشمى اللى عمرك ما شمتيه . و من المعروف ان اسلحة الخوانس بتبقى فى اوجهها فى شهور الصيف. و النعمة ما عايزاكى تقلقى. آل خنساوات فلسطين آل.

المهم شفت البوست دة و قلت لاءااااااا مفيش حاجة هتجبرنى انى اخرج من البيات الصيفى و ادون. بالك سابتنى اختى المدونة البريونية فى حالى؟ كلا و حاشا. نزلت نزلت نزلت بالسكرول الاقى لك بوست انقح من اللى قبله يا مؤمن. قال ايه؟ تاج التقوى! بتقولوا ايه يا ولاد؟ تاج التقوى.

ايه اول سؤال فى تاج التقوى؟

ليه الشباب بيضايقوا البنات و بيتسافلوا عليهم؟

قامت راصة كل الأسباب الحمضانة بتاعة عدوا التلاتين و البنات لبسها ملفت مايتخرجش بيه من البيت.

و النعمة ياختى الشباب عدوا التلاتين ما البنات كمان عدوا التلاتين. نروح بأة نمد ايدنا على الشباب فى الشارع و لا نعمل ايه؟ و بعدين لبس بنات ايه اللى الأخت بتتكلم فيه؟ هو عاد فيه لبس! دة كل ماشى مجرجر فى الشارع و لا افغانستان.

السؤال التانى

ما سبب تبرج البنات و العياذ بالله؟

قال ايه عايزين يتجوزوا! لدرجة ان واحدة قالت لها انها بتحط ميك آب خفيف ! هزلت و الله! هى وصلت لميك آب خفيف! دة اللى ناقص!

و بعدين قامت الأخت الفاضلة بالإدلاء بجردلها فى الموضوع ان و الله تلات مرات ما هما متجوزين كدة، ما معناه آدى دقنى اهيه لو اتجوزتوا و حتى لو اتجوزتوا فاللى متجوزك بمنظرك دة عايز جارية، فاهمة يعنى جارية؟ خسئتى و ثكلتك امك! لكن بأة لو لبستى مجرجر، يا سلام لو لبستى مجرجر هيجيلك واحد بدقن فلة ترعى فيها الحمير مش بس الحشرات يعاملك معاملة الشنتل مان الحقة.

السؤال التالت

هل تتدخل اسرتك فى انتقاء ثيابك

لا و الحمد لله

انا ليا الحرية البس زى ما انا عايزة. ألبس مجرجر ازرق مجرجر اسود مجرجر رمادى اسرتى مابتدخلش. هما واثقين انى مش هنقى الوان مخلة بالدين و الشرف.

السؤال الرابع

ما هى نظرة الناس للفتاة المتبرجة؟

و دة ردت عليه بمثال ان معاها فى اللجنة بتاعة الإمتحان بت مش و لا بد من المتبرجات و العياذ بالله. و البت باين مزة شوية و شعر اصفر و بنطلونات و وصلت بيها السفالة انها بتلبس بلوزات ربع كم ، لما بيراقبوا عليهم ستات بيبقوا عايزين يولعوا فيها. طبعا! ما هم تلاقيهم ستات شبه عبعزيز مخيون.

الناس دى عايزة ايه تانى؟

بجد عايزة ايه تانى؟

كل دة و البنات متبرجة و البلد لسة بعيدة عن الدين؟

طب قولى الناس معندهاش ضمير اقول لك اه

قولى الناس نفسوياتها بقت سودا و قلبها حامض اقول لك صح

قولى الناس منافقة و متدينة مظهريا بس اقولك قشطة

لكن برضه لسة بتتكلموا فى لبس البنات!

هو مفيش فى الدين غير لبس البنات و شغل البنات و جواز البنات!

الله يحرق الستات كلهم عشان ترتاحوا و لو ان لو حصلت مش عارفة الحقيقة هتتكلموا فى ايه. اكيد مش هتلاقوا حاجة تتكلموا فيها.